USA ka lalaki ang gipusil samtang nag-inom uban sa iyang mga higala pasado ala una kagahapon sa kaadlawon sa Sityo Llaguna, Barangay Bulacao, dakbayan sa Sugbo.

Samdan sa iyang tiyan mao si Reynold Cabanes, 27, ug nagpuyo sa naasoy nga lugar.

Sa pasiunang imbestigasyon sa mga sakop sa Homicide Section ngadto kang Marissa Cabanes, igsuon sa biktima, nibutyag nga nag-inom ang biktima uban sa iyang mga higala, kalit miabot ang wala mahilhing lalaki ug dayong pusil sa biktima.

Human sa pagpusil, kalma nga milakaw palayo ang maong lalaki ug ang biktima gidala sa ilang kabanay sa tambalanan.

Gisubay pa sa kapolisan ang pagkatawo sa biktima aron masayran ang posibling motibo sa pagpamusil.

Unang gidala ang biktima sa Cebu City Medical Center apan gibalhin sa Don Vicente Sotto Medical Center alang sa dugang pag-atiman.