IGO na lamang sa pagpatabang sa kapulisan kining usa ka lalaki human 42 ka cellphone sulod sa iyang repair shop ang gikawat ug nadiskubre na adlaw’ng Miyerkules mga alas 6:50 sa buntag sa P-5, Halapitan, San Fernando, Bukidnon.

Si Willy N. Santiniaman, 35, minyo, residente sa Purok 7 sa susamang dapit niasoy sa kapulisan sa San Fernando Police Station nga pagdangat niya sa iyang repair shop namatikdan na niini nga naguba ang padlock.

Pagsusi sa sulod, ubay-ubay ka mga cellphone ang nawala.

Kini gilangkuban sa 15 ka unit sa Samsung nga cellphone; 5 ka unit sa Nokia; 10 ka unit sa Huawei; duha sa Cherry Mobile touch screen; 5 ka units sa UFO; 5 units sa VIVO; 30 ka ka mga cellphone battery pack; ug 10 ka mga headset. Kini tanan gibana-banang mokantidad og P70,000.

Nakita sa closed-circuit television camera nga mga alas 10:10 Martes sa gabii giransak ug duha ka mga wala pa mailang lalaki.

Nabiyaan lamang kini niadtong tungora sa igsuon ni Santiniaman tungod kay dunay gilakaw apan kini gyud maoy gakatulganan sa dapit.

Ang kapulisan sa San Fernando ang padayon sa pagsuta kinsa ang responsable sa pagpangransak.