GITAKDANG mobisita ang mga eksperto gikan sa Research Institute for Tropical Medicine (RITM) ug World Health Organization (WHO) sa Northern Mindanao aron pagsusi sa mga laboratoryo karon nga semana.

Tumong niining onsite visit nga masuta ang mga laboratoryo sa rehiyon alang sa posibleng pagbaton og coronavirus disease (Covid-19) testing.

Gibutyag ni Dr. Ian Gonzales, nangulo sa Infectious Disease Cluster sa Department of Health -- Northern Mindanao, nga i-evaluate ang mga laboratoryo kung aduna bay kapasidad ang rehiyon alang sa Covid-19 testing.

“This week naa ta’y mga eksperto gikan sa RITM and WHO na moanhi diri sa atong rehiyon para i-evaluate ang atong mga laboratories,” pahayag ni Gonzales.

Giingong lakip sa mga laboratories mao ang laboratoryo sa Northern Mindanao Medical Center (NMMC) TB reference center sa DOH-Northern Mindanao, ug uban pang laboratoryo sa private hospitals.

Giingong paabuton kini ilabi na kung masuta nga kaya na sa rehiyon nga dunay testing.

“Kung kaya na ba, naa ba’y kapabilidad nga maghimo og atong kaugalingon nga testing, so paabuton nato soon basi kaya na nato mag test dinhi sa rehiyon,” dugang pa.

Nasayran nga sa kasamtangang gipadala pa sa Southern Philippines Medical Center (SPMC) sa Davao ang mga throat swab specimen kon sample alang sa confirmatory testing sa Covid-19 sa mga pasyente dinhi sa rehiyon.