USA ka lalaki nakabsan sa kinabuhi sa pagpamusil nga nahitabo niadtong Huwebes mga alas 2:12 sa hapon sa Roa St. Barangay Poblacion 5, lungsod sa Balingasag, Misamis Oriental.

Sa inisyal nga imbestigasyon sa kapulisan sa Balingasag Police Station, nasuta nga usa ka sakyanan nga Izuzu AUV naka-parking niadtong tungora sa naasoy’ng dapit.

Sakay niini si Kent Topacio, 39, lumad nga taga lungsod sa Binuangan ug driver nga giilang si Francis Rapatan, 37, lumad sab nga taga lungsod sa Kinoguitan. Aduna sab silay kauban nga 3 anyos nga minor de edad nga bata.

Apan sa kilid nga bahin kalit nga milipot ang usa ka wala mailang lalaki ug gipusil sa ulo si Topacio samtang gilakip dayon ang driver.

Gituohang kalibre 45 ang gigamit kay maoy nahipos nga basyo sa bala human sa pagpamusil.

Daling misibat ang suspetsado taliwala gilusad deretso ang man hunt operation batok niini.

Ang mga biktima pulos gipangdala sa Misamis Oriental Provincial Hospital sa lungsod sa Balingasag diin si Topacio ang ana sa talandugon nga kahimtang samtang ang driver nga si Rapatan nagpaalim samad sa lawas nga naangkon.

Si Police Senior Inspector Arlyne Ranario kinsa tigpamaba sa Misamis Oriental Provincial Police Office niingon sa SunStar SuperBalita nga nakatawag ang asawa sa buhatan sa police station ug nipahibalo nga nakabsan sa kinabuhi si Topacio.

Matud ni Ranario nga gihimo pa sa kapulisan ang masusing imbestigasyon unsa ang mga transaksyones nganong nahitabo ang pagpamusil labina dili taga lungsod sa Balingasag ang mga biktima.

Giatiman sab karon ang bata nga nakasaksi sa hitabo tungod kay daw posibleng natrauma.