TARGET sa kadagkuan sa Land Transportation Franchising and Regulatory Board (LTFRB)-Northern Mindanao nga wala nay kolorum nga taxi ang magdagan sa Siyudad sa Cagayan de Oro sa tuig 2020.

Nagpahigayon ang LTFRB og inspeksiyon sa liboan ka mga taxi sugod Nobiyembre 21 hangtod Nobyimbre 23 adlaw nga Sabado sa Upper Carmen ning siyudad.

Gibutyag ni Regional Director Aminoden Guro sa LTFRB nga kabahin kini sa hugot nga kampanya nga hingpit na nga mahanaw ang mga kolorum sunod tuig.

“Part ni siya, I hope nga by 2020 ang taxi nato dinhi sa Cagayan de Oro wala nay kolorum nga gadagan nga taxi,” matud ni Guro.

Gidugang pa nga gawas sa pag-inspeksiyon nagmugna usab ang maong buhatan kauban ang lokal nga kagamhanan sa siyudad og Inter-agency Task Force aron pagsugpo sa mga kolorum.

“Well every now and then moporma kita og inter-agency task force, in fact atong city council nag request na sa Central Office nga unta butangan pud i-replicate og I-ACT sa Cebu, sa Davao ug sa Iloilo,” dugang pa Guro.

Nasayran nga anaa na sa kapin singkwenta ka mga kolorum ang nadakpan sa LTFRB ug na-impound sa Northern Mindanao ilabi na sa dakbayan ug Iligan City.

Kahinumdoman nga anaa sa 2,770 ka mga legal nga taxi ang nagdagan sa siyudad ug singko ngadto sa 10 porsyento o kapin kon kulang 300 niini ang kolotm.

Nanawagan usab si Guro sa mga operator nga moadto sa Upper Carmen hangtod sa adlaw nga Sabado alang sa ilang inventory gikan alas 8 sa buntag hangtod alas 4:00 sa hapon.