GIBANA-BANANG anaa sa gatosan ka libo ang nisaksi sa Higalaay Pyro Fest sa SM Uptown sa siyudad sa Cagayan de Oro.

Gibutyag ni Police Major Evan Viñas, tigpamaba sa Cagayan de Oro Police Office (Cocpo), nga anaa sa mga 150,000 ka mga katawhan ang nidagsa sa maong kalihokan ug malampuson kining natapos ug walay natalang mga dagkong insidente.

"More or less 150,000 spectators sa pyrotech festival kagabii," matud ni Viñas.

Mapasalamaton usab ang kapulisan sa katawhan sa suporta ug mga pagsabot diha sa ilang pagpatuman sa seguridad alang sa kahusay ug kalinaw sa tibuok nga pagpahigayon sa Higalaay Festival 2019.

Matud ni Viñas nga malinawon ang tanang mga core events bisan pa man sa pagdagsa sa katawhan dili lamang gikan sa siyudad apan sa ubang kasikbit nga mga dapit.

Gibutyag ni Eileen San Juan, tsirman sa Higalaay Festival, nga ubay-ubay gyud ang nisaksi ilabi na nga naandan na kini sa katawhan.

"Good crowd, good weather, good organization unya naa tay bag-o nga feature sa atong fireworks," matud niini.

Gidugang pa niini nga dakong hagit alang kanila nga mas nindot pa ug sadya ang sunod tuig nga pagsaulog sa Higalaay Festival gumikan kay karon pa lang daghan na ang mga bisita ug dili mga basta-basta sama nila ni Miss Universe 2015 Pia Wurtzbach ug Miss Universe Philippines nga si Gazini Ganados, mga celebrities ug uban pa.