PATAY ang usa ka lalaki human nisukol sa kapulisan sa follow-up operation sa coastal road, Barangay Gusa, siyudad sa Cagayan de Oro, mga alas 2 Miyerkules sa kaadlawon, Pebrero 27.

Nakabsan sa kinabuhi si Wilson Galvez, sakop sa Batang Mindanao, nga taga Dulawon, Lumbia ning siyudad, kinsa gitumbok nga nanulis sa usa ka lalaki (identipikasyon gipugnan).

Sa nahipos nga impomasiyon giingong nagpaabot ang biktima sa iyang hinigugma apan kalit nga giduolan si Galvez og naka-jacket nga dunay hood ug kalit nga nideklara og tulis.

Dali usab nga nagpakitabang ang biktima hinungdan nga nagpahigayon og follow-up operation ang Police station 3 sa Agora ubos kang Police Chief Insp. Julius Clark Prisco Macariola IV.

Dihang sitahon sa kapulisan si Galvez kalit kining namusil hinungdan nga napugos pagbalos ang kapulisan.

“Ang atong supek ang unang nagpabuto pagkakita sa atoang pulis mao nang pag approach, ang atoang tropa pag-abot sa area nagbinantayon gyud mao na pagpabuto sa suspetsado nakabaik gyud og buto dayon ang atong pulis,” matud ni Macariola.

Nakaangkon ang suspetsado og duha ka samad pinusilan sa dughan nga bahin hinungdan usab sa hinanaling kamatayon samtang nakuhaan usab kini og gitoohang shabu lakip na kalibre .38 nga armas.

Ang patay nga lawas ang kasamtangang anaa pa sa morgue sa Northern Mindanao Medical Center ning siyudad sa pagsulat niini nga balita.