GIINGONG gamay kaayo ang kitaon sa Misamis Oriental Integrated Sports Center (MOISC) kung makasinati ang pag-ulan og daot nga panahon.

Kini ang gikumpirma ni MOISC general manager Prexy Elipe sa SunStar SuperBalita.

Gibutyag niini nga ang oval lang daan, mokita kini og P300,000 ang bulan apan kung ting-ulan moubos sa P100,000 na lamang. Ang oval mokantidad og tag P15 ang matag usa sa mosulod ug modagan niini.

Sulod sa usa ka bulan, ang tibuok sports facilities sa MOISC mokita og P1 milyon apan 70 porsiyento sa kita niini mapaingon ngadto sa mga trabahante nga dili mominos og 60 kabuok.

Gibutyag sab niini nga sa pagkakaron gipalambo pa nila ang gym sulod sa Moisc lakip ang swimming pool area.

Wala usab kamatuoran ang report nga adunay gapaniaw niini sukwahi sa nangawas nga report diha sa social media.