NAKADAWAT og multi-purpose truck ang 16 ka mga barangay sa dakbayan sa Mandaue sa Biyernes, Septiyembre 25,2020, kansang seremonyas gihimo sa atubangan sa Mandaue City Hall.

Niadtong Hulyo, mipalit ang lokal nga kagamhanan sa Mandaue og 27 ka mga multi-purpose truck alang sa tanang barangay, siyam niini nahatag na sab sa siyam ka mga barangay sa maong buwan.

Sa pakighinabi sa Superbalita Cebu ni Atty. John Eddu Ibañez, executive secretary ni Mandaue City Mayor Jonas Cortes, nga ang 16 ka mga barangay nga nakadawat sa ikaduhang batch.

Aduna na lay duha ka mga barangay nga wa pa makadawat.

Ang 16 ka mga barangay nga nakadawat niadtong Septiyembre 25 mao ang: Cabancalan, Cubacub, Jagobiao, Opao, Subangdaku, Tawason, Tingub, Umapad, Canduman, Banilad, Basak, Guizo, Ibabao-Estancia, Maguikay, Mantuyong ug Pagsabungan.

Ang nakadawat na sab niadtong Hulyo mao ang Barangay Alang-Alang, Bakilid, Camabaro, Centro, Casili, Casuntingan, Labogon, Looc, ug Tipolo.

Ang wala pa makadawat mao ang Barangay Tabok ug Paknaan.

Giklaro ni Ibañez nga ang lista kon kinsa ang makadawat sa matag batch gikasaboptan na daan sa mga barangay.

Ang paghatag niini dako nga ikatabang ngadto sa kada barangay labi na sa paghatag og serbisyo sa mga konstituwente sama sa paghakot og mga butang ug mamahimo sab kining gamiton isip garbage truck,sigon ni Ibañez.

Ang matag dumptruck gipatikan na og ngalan sa barangay nga nakadawat niini. (KFD)