USA ka libo pa ang nabakunahan batok sa Covid-19 sa Lungsod sa Cordova sukad sa pagsugod sa ilang mass vaccination niadtong Septiyembre 18, 2021.

Gihangyo ni Cordova Mayor Therese Sitoy-Cho ang publiko lakip na ang pribadong sektor sa lungsod nga motabang sa kagamhanan nga madugangan ang gidaghanon sa mga magpabakuna.

Subay sa nagpadayong mass vaccination, moabot na sa 1,122 ang nabakunahan sa unang dose.

Butang nga gipasalamatan ni Cho sanglit gikinahanglan sa iyang mga konstituwente ang proteksyon pakigbatok sa Covid-19.

Base sa uwahing talaan sa kagamhanan, 11.8 porsiyento sa kinatibuk-an nga population sa lungsod ang fully vaccinated samtang, 11.5 porsyento ang nakadawat na sa unang dose.

Sa kasamtangan, anaa sa 70, 595 ang kinatibuk-an nga population niini.

Bisan pa man og nabakunahan na, padayon nga giawhag ni Cho ang iyang mga konstituwente sa pagsubay sa tanan nga health protocol aron malikay sa pagtakboy sa bisan unsang sakit labina na sa Covid-19. (ANV)