HUMAN makakuha sa tanang rekisitos nga gikinahanglan sa Land Transportation Franchising and Regulatory Board (LTFRB), ang Golden Eagle Cebu Transport Cooperative (GECTC), ang bag-ong natukod nga kooperatiba alang sa pampublikong sakyanan, andam nang moserbisyo sa kadalanan dinhi sa dakbayan sa Sugbo.

Si Agustin “Rolly” Isugan, chairman sa board of directors sa maong cooperative, mibutyag nga sa sunod buwan hayan aduna na silay mga unit sa modern taxi nga magdagan na unya sa kadalanan.

Ang GECTC maoy pipila lang sa mga transport cooperative nga naaprobahan sa LTFRB human kini nakakompleto sa mga dokumento nga gikinahanglan.

Aduna na usab kini bag-ong natukod nga opisina nga anaa mahimutang sa Sitio Pundok, Pit-os, dakbayan sa Sugbo.

Aron usab pagtuman ug pagsunod sa modernization program sa administration ni Presidente Rodrigo Duterte, ang GECTC mipili sa Montero Mitsubishi-SUV nga maoy ilang himuon unit isip premium taxi.

Daghan tag gipilian pero kini maoy nauyonan sa board nga atong himuong premium taxi,” matod ni Isugan.

Nagkanayon usab si Isugan nga gawas sa mga taxi, mo-apply usab sila og franchise alang sa mga Public Utility Vehicle Modernization Program (PUVMP) nga moserbisyo sa pipila ka kalungsoran.

Ang ubang milangkob sa BOD mao sila si Mary Caroline C. Botter isip vice chairman, ug mga sakop sila si Wesley Adam Rivera, Napoleon Reagan Colinares ug Rafael Ofredo. (PR)