KAPULISAN sa Siyudad sa Sugbo mopasaka og tulo ka mga kaso batok sa lalake nga nagbinastos atol sa Sinulog grand parade, diin iyang gisagulan og luwa ang pintal nga iyang gipahid sa mga tawo nga iyang makita.

Ang hitabo nakuhaan og video, na-upload sa social media ug nag-viral.

Bisan sa pagtahan ug pagpangayog pasaylo ni Jason John Tapales, taga Siyudad sa Danao, ang kapulisan sa Siyudad sa Sugbo mopasaka og kaso batok kaniya.

Matod ni Police Colonel Engelbert Soriano, officer-in-charge sa Cebu City Police Office, mga kasong grave scandal, unjust vexation ug offending religious belief nga naa sa Revised Penal Code.

Dugang ni Soriano nga wa pa sila masayod unsay hukom sa Cebu City Government officials sa pagtahan ni Tapales, kinsa gitawag og “Boy Laway” tungod sa nag-viral niyang gibuhat.

Apan sila mohinayon sa pagpasaka og kaso batok kang Tapales sa Cebu City Prosecutors Office.

Si Tapales nitahan sa buhatan ni Konsehal Joel Garganera sa miaging semana kuyog ang duha ka mga opisyal sa Dakbayan sa Danao.

Matod ni Garganera nga bisan napasaylo na si Tapales, apan mangandam siya gihapon kon dunay mopasaka og kaso.

Si Soriano gusto nga si Tapales ideklarar nga persona non grata, apan naa ra kini sa Konseho sa Dakbayan sa Sugbo. (AYB)