GISUSPENSO ni Mayor Tomas Osmeña og tulo ka buwan ang katukoran sa phase 1 sa bag-ong Cebu City Medical Center (CCMC) gumikan sa pagkalangay sa contractor paghuman sa P564 milyones nga proyekto.

Base sa inspection sa Department of Engineering and Public Works (DEPW), niabot na og 23 porsiyento ang slippage o kalangay sa C.E. Padilla Construction, Inc. kansang 10 ka andanang CCMC mahuman unta karong Mayo 27.

“On the basis provided under Section 9 of Annex E of the IRR of RA No. 9184, undersigned hereby orders the aboved named parties for temporary suspension of works for ninety calendars days,” tipik sa suspension order nga giisyu ni Osmeña.

Si Engr. Kenneth Enriquez sa DEPW nagkanayon nga gipadad-an na nila og show cause order ang C.E. Padilla Construction, Inc. pipila na ka semana ang nakalabay apan wa kini gidawat hinungdan nga ila nalang gipadala pinaagi sa email.

“You are hereby informed and to explain in writing why your contract for the construction of CCMC phase 1 will not be terminated due to the incurrence of the slippage while the project is still on-going,” nagkanayon ang show cause order ni Enriquez.

Matod sa pangu sa DEPW nga sunod semana ilang gipaabot nga iduso sa C.E. Padilla ang ilang tubag human sila pormal nga gipahibawo ug dihang ilang nadawat ang order, gihunong na sa contractor ang pagtrabaho sa edepisyo.

Kini maoy ikaduhang pagsuspenso sa construction sa CCMC human gisuspenso usab kini ni Konsehal Margarita Osmeña dihang siya ang nahimo nga acting mayor niadtong tuig 2016 gumikan sa kakuwang sa building permit.

Sa suspension order ni Osmeña, gipahibawo niini nga mahinungdanon ang paghunong sa trabaho hangtod maresolba ang isyu aron di mausikan ang kwarta sa gobiyerno.

“The temporary suspension of works is appropriate to prevent government wastage of funds pending the adjustment of plans and designs,” dugang sa mayor.

Si Konsehal Mary Ann de los Santos, chairman sa committee on health, nagkanayon nga kutob nalang sa unom ka andana ang katukoran sa CCMC diin ang ubang private rooms himuon nga ward aron makaatiman og dugang pasyente.

Dugang ni Delos Santos nga aduna nalay 219 ka bed capacity ang tambalanan diin sobra gihapon kini sa 200 beds nga maoy gipangayo sa Department of Health aron ma-accredit ang CCMC sa tertiary level.