EX-CONVICT nakuhaan og dul-an sa P1 milyon nga balor sa drugas atol sa buy-bust sa Biyernes sa alas 2 sa kaadlawon, Oktubre 9, 2020, sa Purok Nangka, Barangay Estaca, lungsod sa Compostela.

Si Eduardo Sambilad, 38, ulitawo, kanhi nabalinggo sa Cebu Provincial Detention and Rehabilitation Center (CPDRC) ug giila sa kapulisan nga usa ka high value individual.

Lakip sa nasikop ang giingong iyang mga kakunsabo nga sila si Marjorie Apas Danlag, 43, dunay kapuyo; ug Dongelito Arnado, 43, ulitawo.

Si Police Lt. Colonel Randy Korret, hepe sa Provincial Intelligence Unit (PIU) sa Cebu Police Provincial Office (CPPO) uban sa Provincial Drug Enforcement Unit (PDEU) nipahigayon sa buy-bust.

Si Sambilad ilang gipalitan og usa ka medium nga putos balor og P500.

Atol sa operasyon, nakuhaan og laing tulo ka large nga putos sa gituohang shabu ug laing lima ka medium.

Ang tanan motimbang og 105 gramos nga mobalor og P714,000 base sa Dangerous Drugs Board (DDB) value.

Samtang gipusasan sab ang usa ka high value individual (HVI) nga nadakpan sa buy-bust operation alas 7:40 sa gabii sa Oktubre 8, sa Sitio Site Brgy. Poblacion, Dakbayan sa Toledo.

Si Renato Mancia, 33, minyo, nakuhaan og 17 gramos nga shabu nga mobalor og P115,600 base sa DDB value ug 10 gramos nga pinaugang marijuana. / GPL