NALUWAS sa tino nga kamatayon ang usa ka ex-convict human pusila alas 6:20 sa buntag, Dominggo, Agusto 11, 2019 sa may South Road Properties Access Road, Sitio Tangke, Barangay Mambaling, Dakbayan sa Sugbo.

Ang biktima mao si Alexander Margaja Villarosa, 24, molupyo sa maong lugar.

Giila ang suspek nga si alyas “Jingtwin” nga taga Sitio Vikings, Barangay Alaska Mambaling.

Dali nga gidala ang biktima sa Cebu City Medical Center ug nakaangkon kini og samad pinusilan sa iyang dughan, walang abaga ug walang paa.

Sigon sa biktima nga human siya pusila, dali siya nga midagan sa usa ka gasoline station ug didto nangayo og panabang.

Ang suspek misibat dayon sa wala matino nga direksyon.

Nagduwa lang matud pa og billiard ang biktima sa maong lugar diin kalit lang nga naabot si Jingtwin, nga iya ra usab nga higala, ug gipusil siya niini.

Usa ka buwan na ang nakalabay diin nakagawas sa bilangguan si Villarosa human siya mapriso niadtong Agusto 25, 2017 sa kasong paghupot sa dili lisensyadong armas.

Giangkon niya nga nabilanggo na usab siya niadtong Pebrero 16, 2013 ug Pebrero 3, 2017 sa kasong robbery ug pagpangawat og motorsiklo.

Nakakuha og impormasyon ang kapulisan nga ang biktima nalambigit na sa mga kaso sa pagpamusil sa Barangay Mambaling ug giingong usa siya sa mga gun-for-hire sa Dakbayan sa Sugbo.

Matud ni Police Captain Francis Renz Talosig, hepe sa Mambaling Police Station, ila pang gisubay unsa'y motibo sa suspek sa pagpamusil.

Sa pagsuwat ning balita, padayon ang manhunt ug follow-up operation sa kapulisan sa Mambaling Police Station batok sa suspek. (Superbalita Cebu)