Andam nga mopasaka og kaso si Cebu Governor Gwendolyn Garcia batok sa Department of Works and Highways (DPWH-7) kon mopadayon kini sa paglangaylangay sa paghuman sa gubaong dalan nga UN Avenue sa dakbayan sa Mandaue habig sa Marcelo Fernan Bridge.

Segun sa taho sa Sugbo News, news arm sa Kapitolyo, nga nakigtigom niadtong Nobiyembre 24 si Cebu Governor Gwendolyn Garcia pag-usab sa DPWH ug BM Marketing aron hisgutan ang compromise agreement.

Kauban niya sa tigum mao sila si DPWH Regional Director Ernesto Gregorio Jr. ug Assistant Regional Director Danilo Villa kauban ang kontraktor nga si Edgar Tiu.

Kini aron mahusay ang tulo ka tuig nang natanggong nga proyekto.

Sa unang tigum nisanong na ang kontraktor sa compromise agreement tungod sa nasayran nga ang Kapitolyo na lang unta maoy mopahuman sa proyekto.

Apan giingong walay klarong tubag ang DPWH labot niini.

Matud sa buhatan nga duna pa sila’y dugang damages nga iduso batok sa kontraktor.

Wala kini mauyoni ni Garcia sanglit maghatag lang kini og kalangay ug kahasol sa mga motorista ug turista nga moagi sa maong dalan.

Sa kasamtangan gitugotan ang BM Marketing sa pagtrabaho sa emergency road access aron matarong ang maong agianan.

Pipila na usab ka mga kontraktor ang nipadayag sa pagtabang sa pag-abuno sa mga lubaklubak nga dalan pinaagi sa Third Engineering District.