MGA kalihukan diha sa Semana Santa angay lang nga himuon sayo sa buntag, sa hapon o sa gabii, aron kalikayan nga dili mabiktima sa heat stroke, heat stress ug makasakit sa panit.

Kini gitug-an sa Philippine Atmospheric, Geophysical and Astronomical Services Administration (PAGASA) Mactan nga sa kinatibuk- an grabeng kainit sa panahon ang masinati ning Semana Santa.

Gani dinhi lang sa Kabisay-an, ilabi na sa Sugbo, gilantawan nga posibleng moabot sa 33 ngadto sa 34 degrees Celsius ang temperatura diin moabot sa 40 ngadto sa 42 degrees Celsius ang heat index.

Ang heat index mao ang kainit nga mabatyagan sa usa ka tawo sa kainit sa temperatura.

Posible masinati ang grabeng kainit sa alas 10 pa lang sa buntag hangtud na sa alas 3 sa hapon.

Hinungdan nga tambag ni Jhomer Eclarino, ang weather specialist sa PAGASA Mactan, sa mga mosalmot sa kalihukan sa Semana Santa ug bisan na sa mga mamakasyunay ngadto sa mga beach nga likayan ang maong mga orasa nga magdugay diha ubos sa kainit sa panahon.

Easterlies kon hangin gikan sa silangan lang ang weather disturbance nga nakaapektar sa panahon.

Ang kainiton sa panahon ang gilantawan masinati hangtud pa sa weekend.