Susihon na sa Contract Termination Review Committee (CTRC) karong semanaha ang verified report sa Department of Engineering and Public Works (DEPW) nga ilang nadawat niadtong Disyembre 22, 2022 para sa pormal na nga pagputol sa P907 milyunes nga kontrata tali sa Cebu City Government ug sa contractor sa Cebu City Medical Center (CCMC).

Si Atty. Carlo Vincent Gimena, chairman sa CTRC nga giumol sa Cebu City Government pinangulohan ni Mayor Michael Rama, nagkanayon nga wala nila naatiman dayon ang verified report sa DEPW sanglit naka-on leave ang ubang member sa committee.

Ang chairman sa CTRC nagkanayon nga human sa ilang pagbasa sa report sa DEPW, pahibaw-on usab nila ang contractor nga maoy nakadaog ug maoy na-awardan sa P907 milyunes para pagtiwas unta sa nahabiling mga andana sa CCMC.

“Padad-an pa nato og show cause ang ME Sicat Construction sa verified report para naay due process. Once ma-receive nato ilang comment or explanation, that’s the time atong i-evaluate tanan documents before we make appropriate recommendation to the mayor,” pasabot ni Gimena.

Gibana-bana sa pangulo sa CTRC nga molanat pa og kapin o kulang duha ka mga semana ang pagkumpleto sa tanang rekisitos aron ang duha ka mga habig, ang City Government ug ME Sicat, makapirma na alang sa pormal nga pagputol sa kontrata.

Si Gimena nagkanayon nga human unya nila og dawat sa tubag sa ME Sicat, anha pa sila makahimo sa ilang final nga lakang nga mao ang pagpasar og resolution sa CTRC nga nagrekomendar pabor sa pag-rescind na sa kontrata.

Una niini, si Engr. Michael Sicat, presidente sa ME Sicat Construction, nagkanayon nga bisan kon sakit alang niya ang “mutual rescission” apan kinahanglan nila kining buhaton sanglit kini ang maayo nga solusyon.

Niadtong unang mga semana sa Nobiyembre, si Rama nianunsyo nga iyang ipaputol ang P907 milyunes nga kontrata tali sa ME Sicat.

Sukad sa iyang pagpahibawo, ang contractor wala na nitrabaho sa CCMC nga karon ubos sa pagdumala sa DEPW.

Ang mayor niingon nga adunay Cebuano tycoon nga andam motiwas og trabaho sa CCMC pinaagi sa public-private partnership sanglit dili na siya mosugot nga aduna pay public bidding kay napul-an na siya human wa pa gihapon nahuman ang edepisyo nga gisugdan niadtong 2015 pagtrabaho.