PADAYONG nagkaubos ang mga kaso sa coronavirus disease (Covid-19) sa Pilipinas.

Ang Department of Health (DOH) sa Miyerkules, Oktubre 21, 2020, nikompirmar nga dunay 1,509 ka bag-ong coronavirus infections, labing bag-ong natala nga ubos sud sa nakalabay nga 44 ka mga adlaw.

Mas ubos kini kay sa 1,640 ka bag-ong mga kaso nga gitaho niadtong Oktubre 20, apan mas taas kay sa 1,383 infections sa Septiyembre 7, base sa DOH case bulletins.

Bag-ong mga kaso matag probinsya/siyudad padayong nagkaubos diin ang labing taas nga gitaho mao ang 83 sa Rizal, gisundan sa 82 sa Cavite, 66 sa siyudad sa Manila, 65 sa Baguio City ug 57 sa Iloilo City.

Sa alas 4 sa hapon sa Miyerkules, ang kinatibuk-ang mga kaso sa nasod nisaka ngadto sa 362,243, diin ang 43,990 aktibong mga kaso.

Nitaho usab ang DOH og dugang 911 ka dugang recoveries, nga nidala sa kinatibuk-ang nangaayo ngadto sa 311,506.

Dunay dugang 60 nga nangamatay gikan sa Covid-19, nga nidala sa kinatibu-ang nangamatay ngadto sa 6,747.

Sa bag-ong nangamatay, 45 nahitabo sa Oktubre, pito sa Septiyembre ug walo sa Agusto.

Siyam nangamatay sa Calabarzon, walo sa Western Visayas ug tagtulo sa Ilocos, Central Luzon, Bicol ug Central Visayas. Tagduha usab ang nangamatay sa Zamboanga Peninsula ug Bangsamoro. Ang Eastern Visayas, Northern Mindanao, Soccksargen ug Cordillera dunay tag usa nga namatay.

Matod usab sa DOH nga ang 16 ka mga kaso nga gitumbok nga naulian nangamatay diay.

Ang NCR padayon nga top sa listahan sa mga rehiyon nga dunay labing taas og mga kaso sa nakalabay nga duha ka mga semana sa 320, gisundan sa Calabarzon nga dunay 297 ug Western Visayas sa 129. (MVI, SunStar Philippines)