USA ka mag-uuma patay human gitabangan og tigbas sa managsuong silingan nga hubog niadtong Sabado, Septiyembre 5, alas 10:40 sa buntag sa Sitio Sinondolan sa Barangay Victoria, lungsod sa San Remegio.

Si Peter Dahunan, 55, ug mag-uuma, nagkawilkawil ang liog ug kamot human tigbasa sa silingang managsuong sila si Danilo Abarao, Jr., 48, minyo ug Mercendo Abarao, 46, ulitawo.

Si Police Captain Elpidio Tago-an Jr., hepe sa San Remegio Police Station, nga nahinabi sa Superbalita Cebu nagkanayon nga ang biktima gisulong sa managsuong suspetsado sayo sa buntag.

Ang duha nga pulos niangkon sa krimen, nibutyag nga dihang nangahubog sila, ilang nahisgutan ang ilang atraso sa biktima. Nagkakunprontasi dayon nagkasinukmagay ug gitabangan nila ang biktima.

Si Dahunana nga gamay nga tawo, nalupig sa sinukmagay kay dagko ang mga suspetsado.

Mibunot sa kutsilyo nga iyang giluklok sa hawak ug iyang gidunggab si Danilo.

Apan wala siya makaigo, si Danilo, nakakuha sa sundang ug gitigbas ang kamot ug bukobuko sa biktima ug human nahagba giusban ang liog.

“Panit nalang naghupot sa liog Sir kay dihang natumba, gitigbas man ang tangkugo,” asoy ni Tago-an.

Ang mga suspetsado niangkon sa krimen nga naglagot sila sa biktima kay sukad pa kaniadto kanunay kini nga manggukod nila ilabi na nga kon mahubog ug magmaoy. (GPL)