ORMOC City, Leyte -- Giduso sa Konseho sa dakbayan sa Ormoc ang ordinansa nga mag-regulate sa mga internet café sa dakbayan.

Ang ordinansahon nga Internet Acces Ordinance gipangamahanan ni City Councilor Nolito Quilang, chairman sa committee oneEducation.

Matod ni Quilang sa interbyu sa Superbalita Cebu, duna silay nadawat nga mga reklamo gikan sa pipila ka mga ginikanan ug magtutudlo.

Kini may labot sa mga tinun-an nga di manud sa ilang klase gumikan kay naa lang sa mga internet café.

“Nigawas ni nga issue nga concern lang gyod karon ang mga school children nga even during school hours, ang uban dili mapugngan nga naa sa mga internet cafe and nakadawat sab mi letter gikan sa usa ka parent,” matod ni Quilang.

Giklaro ni Quilang, di lang mga tinun-an ang tuyo niini, kundi ang mga bata o kadtong nag-edad og ubos sa 18 anyos.

Gitumbok ni Quilang ang Section 12 sa Republic Act 9775 kun Anti Child Pornography Act of 2009. Sa maong balaud, gihatagan og awtoridad ang mga lokal nga kagamhanan nga mamonitor ug ma-regulate ang mga internet café.

Niini si Mayor Richard Gomez niduso og rekomendasyon sa Sangguniang Panlungsod nga maghimo og ordinansa bahin sa pag regulate sa mga internet cafe ug ubang mga establismento nga susama ang operasyon.

Tukion pa sa ikaduhang pagbasa ang ordinansahon, apan dako og paglaum si Quilang nga mapasar kini nga ordinansa. (JKDP)