Angol ang drayber sa multicab ug pasahero human mi-counter flow hinungdan nga naigo sa bus sa may national highway sa Sitio Katugasan, Brgy. Perrelos, Dakbayan sa Carcar pasado alas 2 sa Martes sa hapon, Mayo 18, 2021.

Ang drayber sa multicab giilang si Alexis, Cardosa, 61, minyo, tagaLungsod sa Malabuyoc, Cebu. Si Cardosa nakaangkon og bali sa tiil gikan sa impact sa bangga diin nalumping ang atubangan sa multicab.

Samtang ang iyang sakay nga si Daniel Sosada, taga Brgy. Magsico, Lungsod sa San Fernando, nakaangkon usab og samad sa ulo nga gikinahanglan nga tahion.

Matod ni Police Corporal Dennis Cabajar, responding officer sa Carcar Police Station nga nahinabi sa Superbalita Cebu, nga ang multicab nga gimaniho ni Cardosa nagbiyahi padung sa south ug ni-counterflow sa pikas nga lane ug wa dayun nakabalik hinungdan nga nabangga sa bus.

“Kaning multicab kay ning overtake ni siya sa nag una niya nga sakyanan. Unya ninggawas gyud ni siya sa iyang lane unya wa

dayun nakabawi maong nasugat sa bus,” dugang ni Cabajar.

Ang Natalie Tours bus gimaniho ni Ephraim Drilon, 63, minyo, taga Brgy. Looc, Santander, Cebu.

Way naangol sa mga sakay sa bus. Niining pagsuwat, gipaabot pa sa kapulisan ang pamilya ni Cardosa ug management sa bus aron magsabot sa danyos.