Namatay diha-diha ang usa ka trabahante sa ahosan sa Carbon Public Market sa Barangay Ermita, Siyudad sa Sugbo human madat-ugi sa usa ka container van nga puno sa kalbasa dihang nasaghiran ang usa pa ka laing container van.

Ang biktima giilang si Antonio Salonoy, 24,lumad nga taga Barangay Tabon, lungsod sa Dalaguete. Nahitabo kini alas 9:00 sa Martes sa buntag sa Yard 2, Pier 5, siyudad sa Sugbo.

Matod ni Police Major Francis Renz Talosig, hepe sa Mabolo Police Station, nga human madawat ang maong kasayuran ang grupo ni Police Senior Master Sergeant Napoleon Taneo daling miresponde sa dapit.

Ilang nasayran nga usa ka Wilfredo Malinao, 67, taga Deca Homes, Barangay Tungkil, lungsod sa Minglanilla, drayber sa Elf, nagkuha og usa ka container van nga dunay sulod nga mga kalbasa.

Wala siya makabantay nga naigo niya ang usa ka laing container van ug nahulog.