Patay ang usa ka senior citizen human ang gimaneho nga motorsiklo natapsingan sa taxi, alas 5:00 sa hapon sa Miyerkules, Marso 22, 2023, sa Barangay Bato, dakbayan sa Toledo.

Ang biktima giilang si Rodolfo Calzadora, 66, minyo, lumolupyo sa nahisgutang lugar.

Si Calzadora nakaangkon og grabeng samad sa ulo ug lawas, gidala sa usa ka tambalanan sa Toledo City apan gideklarar nga dead on arrival (DOA),

Si Joven Manego, 47, minyo, drayber sa taxi, taga Barangay Looc Norte, Asturias, gitanggong sa kapulisan ug gipasakaan og kaso sa banay sa biktima.

Si Staff Sergeant Fredenil Cabañero sa Toledo City Police Station nga nahinabi sa Superbalita Cebu nagkanayon nga si Calzadora nagsakay sa iyang motorsiklo paingon sa lungsod sa

Pinamungajan dihang nasaghiran sa nagsunod nga taxi sa nahisgutang dapit.

Tungod sa kakusog sa impact, nisarasay ang motorsiklo sa biktima ug nibangga sa iyang gikasugat nga traysikol. / GPL