NAPUTOS sa mga bun-og ug samad ang lawas sa usa ka tindero sa pungko-pungko human tabangi og dunggab ug kulata sa 15 ka mga rugby boy sa Martes sa gabii, Pebrero 16, 2021.

Si Gery Villamor Pelenio, 32, taga Barangay Apas, Dakbayan sa Sugbo, naninda og ginabot sa Benedicto Street, Barangay Zapatera, Dakbayan sa Sugbo.

Duha ka mga libudsuroy nga sila si Ariel Amsay, 28, alyas Manok, ug Winnie Boy Misal, 30, alyas Bruno, unang nangayo kaniya og ginabot.

Matod ni Police Major Albert Quitorio, hepe sa Parian Police Station, wa hatagi ni Pelenio og ginabot ang duha, busa nanglakaw. Si Quitorio niingon nga namalik sila si Amsay ug Misal nga nagdala na og mga kauban.

Way daghang mga pangutana, si Pelenio gitabangan og kulata sa 15 ka mga rugby boys.

Gawas sa pagkulata, duna usay nidunggab kaniya sa iikod hinungdan nga nadala siya sa tambalanan.

Gawas sa mga bun-og sa kalawasan, nakaangkon usab og mga samad dinunggaban si Pelenio. Human niini, paspas nga nangikyas ang rugby boys.

Sa pagsuwat ning taho, wa pay bisan usa kanila nga nadakpan sa sa kapulisan.