BUAKON sa Magnolia Pambansang Manok Hotshots ug Rain or Shine Elasto Painters ang ilang 2-2 nga panagtabla sa panagharong nila’g balik karong alas 7:00 sa gabii sa Game 5 sa semi-finals series sa Philippine Basketball Association (PBA) 2019 Philippine Cup sa Araneta Coliseum.

Ang Hotshots ningposte og makutas nga kadaugan sa Game 4, 94-91, niadtong Lunes s gabii nga maoy nakatabla sa best-of-seven series.

Kini maoy ikaduhang sunodsunod nga kapildihan sa Elasto Painters human nila sugdi ang series og duha ka sunodsunod nga kadaugan.

Giangkon sa Elasto Painters nga nabalaka na sila ning puntoha ug kinahanglan nilang makabawi ning higayuna.

“I thought our team kinda lost our composure and emotions got the best of us,” matod sa usa sa mga sinaligan sa Elasto Painters nga si Gabe Norwood kabahin sa ilang kapildihan sa Game 4.

Nagkanayon si Norwood nga naguba ang ilang duwa sa Game 4 gumikan sa tawag sa mga referee.

Gipasabot ni Norwood nga kinahanglan dili sila magpadala sa kapungot ug magtutok lang og insakto sa duwa bisa’g unsa pa’y desisyon sa mga referee.

“We played a lot better in the fourth quarter when we weren’t complaining (the calls) and not letting those things get into us,” dugang ni Norwood, kinsa natawagan og technical foul sa Game 4 gumikan sa grabeng pagreklamo sa tawag sa mga referee.

“My emotion got the best of me. I felt the call wasn’t correct in my book, but I’m not the ref so that’s a tech and I deserved it.”

Hinuon giklaro ni Norwood nga dili pa ulahi aron mabawi ang momentum sa series. (ESL)