Mipakatap og 46 puntos si Stephen Curry ug sa ikaduhang higayon iyang nalangkat ang NBA scoring title sa dihang gibuntog sa host Golden State Warriors ang Memphis Grizzles, 113-101, Dominggo (Lunes sa Pilipinas).

Kadto maoy ikaunom nga sunodsunod nga kadaugan sa Warriors.

Sa kinatibuk-ang regular season, si Curry nag-averaged og 32.0 point nga dili halayong gisundan ni Bradley Beal sa Washington nga may 31.3 points nga average.

"I had a lot of good looks all night," matod ni Curry. "We were in sync. The guys set great screens for me."

Niadtong 2016, ang 33-anyos nga Curry misakmit usab sa maong titulo. Siya ug si Michael Jordan ra ang bugtong magduduwa sa NBA nga nakalangkat sa maong titulo human motangkod nga 33 anyos.

Nahilakip na usab si Curry nila ni Jordan, Kareem Abdul-Jabbar ug Wilt Chamberlain nga nakapupo og kapin sa usa nga scoring titles, most valuable player awards ug NBA championships.

Sa ikatulong kwarter pa lang, si Curry mipusgay og 17 sa iyang 46 puntos. Sa kadaugan, hugot nga nahuptan sa Warriors ang ikawalong puwesto sa play-in tournament diin ilang ikasangka ang no. 7 nga Los Angeles Lakers alang sa knockout match karong Miyerkules (Huwebes sa Pilipinas).

Bisan tuod og midaog batok sa New Orleans, 110-98 sa katapusang adlaw sa regular season, pakyas gihapon ang Lakers sa ilang tinguha nga makaipsot sa play-in tournament human napildi sa Portland TrailBlazers ang Denver Nuggets, 132-116.

Ang Portland ug Lakers nagtabla sa ilang standing human sa regular season nga may 42-30 alang sa ikaunom nga lingkuranan sa playoffs apan nakabintaha ang Portland sa ilang tie breaking system. (JBM)