WALA pa nahuman ang tahas sa Gilas Pilipinas sa FIBA Basketball World Cup apan aduna na’y importanteng mga leksyon nga nakat-unan ang Sugbuanong higante nga si JuneMar Fajardo.

Alang kang Fajardo, mas daghan siyang nakat-unan dihang nakigbatok ang Gilas Pilipinas sa World No.3 Serbia diin nasugamak sa dakong kapildihan ang mga Pinoy, 126-67.

Giangkon ni Fajardo nga layo pa gyud ang iyang abilidad sa iyang mga kaparang sa Serbia nga si Nikola Jokic, kinsa usa ka All-Star sa NBA gikan sa kampo sa Denver Nuggets.

“Syempre malayo pa, NBA ‘yon eh,” matod ni Fajardo sa interbyu sa Spin.ph.

Mibilib sab si Fajardo sa laing bigman sa Serbia nga si Boban Marjanovic.

“At least tinry ko ang best ko na makipagsabayan sa kanila,” dugang sa pambatong sentro sa San Miguel Beermen.

Gitataw ni Fajardo nga ang iyang gibiliban og maayo mao ang abilidad ni Jokic sa pag-itsa sa gawas ug pagpasa sa bola nga gusto niyang kat-unon og maayo.

“’Yung tira sa labas at ang passing. Kapag kay Jokic kasi ‘yung bola, gumagalaw ang lahat [ng kakampi] so napapasahan n’ya. Hindi lang nakatayo mga kakampi n’ya,” matod ni Fajardo. (ESL)