PADAYON ang pagpamupo og gold medal sa Pilipinas human nga gidominar ni Jermyn Prado ang women's individual time trial sa pagsugod sa road race event sa cycling sa nagpadayon nga 30th Southeast Asian Games sa Tagaytay Huwebes, Disyembre 5, 2019.

Gitapos ni Prado ang rota nga nanukad gikan sa Nasugbu, Batangas hangtod sa Praying Monument sulod sa 44 minutos, 33.742 segundos aron langkaton ang ika-57 nga gold medal sa Pilipinas.

Nagsunod ni Prado si Luo Yiwei sa Singapore sa oras nga 44:48.518, samtang ikatulo si Somrat Phetdarin sa Thailand (44:58.152).

Misugod pag-arangkada si Prado sa katapusang 23.1 kilometro sa rota aron sungkiton ang kadaugan nga migintang lang og kuwatro segundos sa nagsunod kaniya.

Tungod sa kakutas ug kaluya, nakuyapan sa makadiyot si Prado, sakop sa Philippine Navy-Standard Insurance Continental Team, human kini makalabang sa finish line.

Siya maoy ikatulong nakakuha og gold sa cycling, sunod nila ni Lea Denise Belgrira ug John Derick Farr sa mountainbike. (JBM)