MGA duwa karon

4:30 pm- Alaska batok Meralco

6:45 pm- Magnolia batok NorthPort

Pulos krusyal nga mga kombati ang nakahan-ay sugod karong hapon sa pagpadayon sa Philippine Basketball Association (PBA) 2019 Philippine Cup sa Araneta Coliseum.

Sa premirong duwa, magsangka ang Alaska Aces batok Meralco Bolts samtang magtagbo sa main game ang NorthPort Batang Pier batok Magnolia Ang Pambansang Manok Hotshots.

Ang tanang teams nga nangahisgutan pulos ana sa delikadong kahimtang ug pulos nagtinguha nga makakumpayot pa sa inilugay og puwesto sa quarter-finals.

Ang Hotshots ug Aces nagbahin sa ikawalong dapit nag pulos adunay 3-5 nga rekord, ang Bolts naa sa ika-10 nga dapit bitbit ang 3-6 nga rekord unya naa sa ika-11 ang Batang Pier nga naay 2-5 nga baraha.

Ang mapilde ning mga sangkaa seguradong magpas-an og dakong problema sa ilang abaga kabahin sa ilang poruhan sa quarter-finals.

Ang panagsangka sa Hotshots ug Batang Pier makonsiderar na nga tinagakay gumikan kay ang mapilde kuli nang makalugnot gikan sa gunit sa panamilit.

“We need to play with a sense of urgency. Kailangan manalo at makabwelo for a strong finish in the elims,” matod ni Hotshots coach Chito Victolero.

Dili ra sab halayo ang senaryo kabahin sa panagsangka sa Aces ug Bolts.

“Once again, it’s practically a do or die for both teams so we are expecting an intense battle with Alaska,” pasabot ni Bolts coach Norman Black. (ESL)