Gihamok og dimalas si Rey Suerte ug ang Gilas Pilipinas team.

Kini human nga ang team captain sa Gilas napiangan sa iyang tikod atol sa ilang praktis niadtong Hunyo 9, 2021.

Ang pagkaangol sa produkto sa University of the Visayas (UV) Green Lancers, migintang lang og usa ka semana sa dili pa sugdan ang 3rd window Fiba Asia Cup qualifiers sa Clark, Pampanga.

“The swelling is significant,” matod ni Gilas project director Tab Baldwin nga napatik sa GMAnews.tv.

“He was recently designated as our team captain, so this is not good news at all. It’s unfortunate because he was also doing very well in practice.”

Ang resident therapist nga si Dexter Aseron mibutyag nga nagkinahanglan og usa o duha ka mga semana ang pagpaalim sa second pick sa 2019 Special Gilas Draft sa Philippine Basketball Association.

“We’re hoping there will be no fractures when he gets his x-ray,” ni Aseron pa. Ang nahitabo kang Suerte maoy dugang sungog sa kampanya sa Gilas Pilipinas.

Sa sayo pa, dili na usab makaduwa sa Gilas sila si Matt Nieto ug Dave Ildefonso, kinsa pareho sab nakasinati og pagkaangol.

“Rey has been our captain and eldest member of the team so his maturity has been a stabilizing force in our group. He’s also an excellent three-point shooter who has a scorer’s mentality so he has become a reliable source of points,” dugang ni Baldwin.

“We will miss his leadership and scoring punch in the team.”

Sa 3rd window, ang Gilas nakatakdang makigharong sa South Korea sulod sa duha ka mga higayon sa Hunyo 16 ug 20, 2021.

Ikasangka sab sa Gilas ang Indonesia karong Hunyo 19, 2021. (JBM)