JOJIE E. OGA-OB

Barili, Cebu

Aduna gyuy punto sa atong kinabuhi

nga luguson ta sa kinabuhi mismo.

Usa ka higayon kanus-a mausab

ang atong pagtan-aw sa kalibutan.

Iya tang hukasan sa atong pagka inosente

bisag dili ta ganahan apan lagi mao man

ang gipangayo sa kahigayonan.

Duawon ta niyag balik-balik

sa atong kuwarto diin sa kadugayan

makat-on na lang tag lad-ok sa atong garbo

hangtod nga moabot sa punto nga maanad

na lang ta ug ang mga kasakit

ato na lang ikatawa.