MIABOT na ang buwan sa Disyembre.

Bugnaw ang hutuhot sa hangin,

Ang katawhan madasigon nagpahiyom

Ang diwa sa Pasko unta maangkon.

Ang kadalanan tugob sa dayandayan.

Mokipatkipat nga mabulukon ang gilaw

Sa mga Christmas light daw mga aninipot

Nga nakig-indig sa mga silaw sa Buwan.

Ang Belen nga gidayan sa nataran

Nindot sud-ungon kay ang Balaang Bata

Natawo man sa kabos nga pasungan

Nga giapungan sa Iyang ginikanan.

Ang diwa sa Pasko atong mabatyagan

Sa nanghatag og mga pinaskuhan

Sa mga kabos nilang mga silingan

Kay ang paghatag giisip nga balaan.

Ang kasadya sa Pasko damhon ta sa dughan

Kay gigasa sa Diyos nga Labing Gamhanan

Ang bugtong niyang Anak sa katawhan

Aron motubos sa tanan natong kasal-anan.