(kang Neñacrace Molina)

Jefferson del Rosario

Danao City, Cebu

Liso ka sa bayabas nga gitangag sa uwak

ug natagak tumong sa akong kasingkasing.

Miturok ka sa nabantok nga dughan nga sama

nag sam-ang nga puno sa pagbasol ug kasubo

sulod sa hataas nga paghuwaw. Dili sayon

ang imong pagturok tungod kay samag saag

ka lang nga nawala sa panon ug nahipunta

sa lugar nga napuno na sa mga nadunot

nang mga pagbati. Apan samtang gahinayhinay

kag paningkamot hinayhinay pod nimong gipahumok

ang nabantok nang mga kanto niini. Hinayhinay

nimong gipahuyang ang sam-ang diin ikaw nahimutang

ug gipanangtang ang mga pagbati nga wala nay ayo.

Gihatagan nimo kini og bag-ong bulok nga mas labaw pa

sa mapulang kolor niini sa kaniadto. Karon miduyog

na kini sa pagpitik sa imong mga gagmayng dahon

nga inanayng nanurok ug mihangad taliwala

sa huwaw nga buot na pod mobantok pag-usab niini.