NAANAD na si Igos nga mangandak ug manghulga. Panday ug mason ang iyang trabaho ug panginabuhi. Kusgan siya ug maskulado. Makakita ganig bikil, mamalikas siya sa iyang gikakontra. Siya ray hawod ug bangis.

“Kolokoy ka! Amaw! Giangu-ango ka na! Ihawon tikaw kon pasakaan mo akog kaso!” Ingon niana kamangtas si Igos kon mamulong sa iyang mga silingan sa Langtad, Naga. Haring gangis siya.

“Way magbuot kanako kon unsay yawyawon ko! Kon supak sila, magpinatyanay kami!” mga pulong ni Igos. Ang mga silingan nga makabati kaniya mahadlok ug malisang kaniya. Nagpaila ug nagpakita siya sa iyang kabangis.

May right-of-way sa kasilinganan, pangpubliko nga agianan. Apan kay ania kini sa kild sa iyang balay, iya kining gibuhatan og abuhan ug gigamit nga dapit sa iyang banay sa pagkaligo ug sa pagpanglaba. Way silingan nga miangal ug milighot na lang sa laing mga agianan.

“Kinsay moreklamo ninyo, ihawon ko dayon!” hulbaw ni Igos.

Unya may pulis nga nahiduaw sa usa sa mga silingan nila ni Igos. Kadugo siya sa kabos nga silingan ni Igos ug nakabati kini sa gipangyawyaw ni Igos. Miduol kini kaniya.

Ang pulis wala mag-uniporme, yano lang iyang panapot, ug gamay rag lawas kompara ni Igos. Nangutana kini, “Kinsa bay gihagit mo?”

Misikmat si Igos, “Kay ngano, gusto mo nga ihawon tikaw?”

Nahikatawa ang pulis. “Manok ba ako nga imong ihawon?”

Nangisog si Igos ug miwarawara sa iyang pinuti. “Subra pas ihawon tika! Miagi ka sa right-of-way. Pahawa! Balik sa imong giagian!”

“Nahibaw-an ko sa akong uyoan nga kining agianan sa publiko ug dili sa pribado mong yuta. Wa kay katungod sa paggamit niini. Dili mo kini gamiton nga imong kusina, kaliguanan ug labhanan nga dapit. Kon magmagahi ka, dakpon tika!’

Nakalitan si Igos. Nahitiurok.

“Pulis ko!” ug gipakita niini ang iyang police badge ug ang gitakin niining pistola sa hawakan. “Sige, tigbasa ko!”

Nagpiratpirat ang mga mata ni Igos. Nagpangalot sa iyang tingkoy. “Na-nangu-ngu-medya ra ko, Sir! Hihihi!”

“Wa ko mangomedya nimo. Hipusa ang abuhan mo ug ayaw na kamo pagpangaligo ug pagpanglaba dinhi sa right-of-way!”

(Katapusan)