BISAG unsa pa ka ambungan o adunahan, kung ang kina-iya bastos o ngil-ad og batasan, taas ang puruhan nga maglisod kini og pangita og higala o kapares nga maka-uban sa dayon kay seguradong matahaha o kaha di ka agwanta sa kina-iya.

Diay akong mga nakuykuyan nga mga sulundong kina-iya ug maayong pamatasan nga angay i-bansay-bansay ug padaghanon.

Ayaw sagunsuna o ipamugos nga tubagon ang imong mga tawag sa telepono kay ang pasabot ini di pa siya katubag kay basig dunay laing ka estorya, busy sa trabaho o dunay mas labing importante nga gi-atiman panahon nga nanawag ka. Busa ayaw kahi-ubos kung di ka diha-diha matubag.

Kung ugaling nakahuwam og kantidad o ba kaha butang, ayaw kalimot sa pag-uli ini. Mas maayo kung imo kining i-uli sa di ka pa sukton kay kini nga kina-iya makapakita man nga ikaw matinud-anon. Ayaw gyud i-thank you ang imong mga utang o kabilinggan bisag parenti pa o suod nga amigo ang gihuwaman.

Ayaw pagmakuli sa pagpasalamat kung adunay nadawat nga tabang bisag unsa pa ka gamay o dako.

Di sab maayo nga mokalit ka og insert o putol sa nag-estorya kung duna kay tuyo. Huwata una nga mahuman sila una ka mo sal-ot, sulod o sulti sa imong tuyo.

Kung dunay mangimbitar og kaon sa restaurant, ayaw pataka ug patuyang og order labi na kung mahal o di suhito sa mga pagkaon ug presyo. Pagbaton og kaikog. Mas maayo pang ang nangimbitar nimo maoy magbuot sa orderon.

Kung dunay magpakita og hulagway sa ilang cellphone, ayaw kini i-swipe patubang sa tuo o wala kay wa ka ma’y pagtugot sa tag-iya nga makakita sa ubang mga hulagway o mensahi sa iyang telepono.

Kung dunay mosulti nimo nga molakaw kay mo adto sa iyang doctor, ayaw kini pangutan-a sa detalye aron di sila mapugos pagtubag nimo sa ilang gibati labi na kung makamatay iyang sakit gawas kung sila mismo mo boluntaryo paghatag sa impormasyon.

Kung makig estorya og bag-ong naka -ila, likaye ang pagpangutana og mga personal nga impormasyon sama sa edad, sweldo og na abot.