NAKONTROBERSYAL ang kura paruko sa Nativity of Mary Parish sa Barangay Canduman, Dakbayan sa Mandaue human siya pasanginli nga nanapat sa 15-anyos nga dalagita.

Giingong nasuko si Fr. Decoroso Olmilla nga wa maatiman ang iyang iro mao nga giingong gibunalan niya ang lubot sa dalaga og baga nga karton ug giingong gipatiran pa.

Ang inahan sa dalagita nipasangil usab nga matag higayon nga di makauyon ang pari, duklon siya ug isalibay ang pagkaon.

Tinuod man o di ang mga pasangil batok kang Olmilla, kini nga isyu seguradong makatibhang na usab sa kredibilidad sa mga alagad sa Simbahang Katoliko.

Dunay mga tawo nga nanalipod kang Olmilla kay alang nila, di kini mahimo sa pari, kinsa unom ka mga tuig nang nag-alagad sa mao nga parokya. Kana kay nilanat siya sa mao nga gidugayon, daghan ang mga tawo nga nakauyon kaniya.

Apan kinabag-an sa netizens ningkondenar sa pari kay isip alagad sa simbahan, ang taas nga pailob gipaabot gikan kaniya. Sa kadaghanan, sila ang gipaabot nga mas maaghop, mapinanggaon ug pasensyuso isip mga alagad sa Diyos. Busa, masabtan ang kasuko sa publiko ngadto kaniya, tinuod man o di ang mga alegasyon.

Kon tinuod man, angay nga manubag si Olmilla sa iyang pagdagmal sa dalagita, kinsa nakaplagan usab sa mga social worker nga maisip nga special child.

Bisan ang inahan nikompirmar nga gidagmalan ang iyang anak, apan di na siya gusto og gubot.

Human masayod sa hitabo, si Cebu Archbishop Jose Palma nimando gilayon sa pag-imbestigar ug sutaon angayan bang abagan nila si Olmilla.

Kon motumaw sa imbestigasyon sa Archdiocese nga tinuod ang mga pasangil batok sa pari, angay nga di abagan sa simbahan si Olmilla kay kon kini buhaton, ang imahen sa Simbahang Katoliko seguradong maguba kay way makauyon sa usa ka tawo nga manapat og bata, labina kon ang giakusahan alagad sa simbahan.