DAW og sa kumoton ang atong kasingkasing nga magtan-aw, ilabi na sa mga bata, nga naugkat gikan sa pagkalubong sa yuta human sa dakong landslide nga nahitabo sa Sitio Sindulan, Barangay Tinaan, dakbayan sa Naga niadtong buntag sa Septiyembre 20.

Daghang mga kinabuhing nakalas sa maong trahediya nga kon dili pa lang tungod sa pagpataka ug pasagad sa mga hingtungdang ahensiya posibli pa unta kining malikayan.

Wala pa man tuoy pormal nga imbestigasyon sanglit nagpadayon pa ang rescue operations sa maong dapit, ang pagpa-bakwit ug pagpahimutang sa mga biktima apan daghan nang mga mitumaw nga nagkasunging pamahayag gikan sa nagkalainlaing habig mga mabasihan sa hinungdan.

Sa niaging buwan pa diay nga adunay liki nga nasigpatan ang mga molupyo sa maong lugar diin gipahigayon ang kinubkubay sa yuta.

Tungod sa mga reklamo nga nadawat, si Naga City Mayor Kristine Chiong daling mipahunong sa quarry operation ug nangayo gilayon og ayuda sa Mines and Geosciences Bureau (MGB) 7.

Pero ambot og unsang pagka-unsaa nga ang findings sa MGB-7 nga kuno ang liki dili gumikan sa quarry operations ug mihatag gilayon kinig clearance nga ipadayon ang kinubkobay.

Kon dili man gani diay quarry operations ang hinungdan sa maong pagliki, sa ilang ka ekspiyerto isip geologist, wala ba diay sila makabantay sa ka peligro niini sa landslide aron unta mapalayas gilayon ang mga molupyo?

Hinaot nga wala untay molubog ug motabon sa tinud-anay nga sitwasyon ug mahatagan og igong kaangayan ug hustisya ang mga biktima atol unya sa imbestigasyon.

Labaw sa tanan atong panghinauton nga dili lang unta kutob lang sa pagbasol ang mga kadagkuan human sa ilang imbestigasyon kon dili atong i-ampo nga mapahamtangan sa saktong silot ang mga responsabli ning tanan aron kapanaminan sa uban.