BISAN kon gitangtang na ni Mayor Edgardo Labella ang mga board of directors sa Metropolitan Cebu Water District (MCWD), wala gihapon masulbad ang problema sa supply sa tubig sa mga lugar ubos sa franchise area niini. Hangtod karon nagpadayon pa ang problema. Pabiling walay agas sa tubig sa ubang mga lugar.

Gitangtang ni Mayor Labella ang mga board of directors ug napugos pag-resign ang chairman nga si Joel Marie Yu. Kini human sila labhi sa mga nagkalain-laing mga local government units. Mga mga konsiho ning maong mga LGUs apil na ang Hunta Probinsiyal mipasar og mga resolusyon nga kusganong nagsaway sa MCWD gumikan kay walay saktong serbisyo.

Ang MCWD usa na karon ka government owned and controlled corporation (GOCC). Come and go lang ang mga board of directors diha depende kon si kinsa ang itudlo sa mayor sa dakbayan sa Sugbo. Base sa balaod nga nagmugna sa Local Water Utilities Administration (LWUA) ang mayor sa siyudad nga maoy pinakadaghan nga consumers ang adunay katungod nga motudlo sa mga board of directors.

Pero asa nay maayo kon i-privatize ang MCWD? Buot ipasabot nga ibaligya ug tugutan nga ang usa ka pribadong kompaniya ang modumala niini aron mahimong ipektibo ang supply sa tubig. Sama sa nahitabo didto sa kauluhan diin ang Metropolitan Water Sewerage Sevices (MWSS) gi-take over sa Maynilad Water Services ug Manila Water Inc, diin gibahin sa duha ka area. Kaniadto nga wala pa gi-privatize ang MWSS, sama sa MCWD nagyaya usab ang serbisyo niini ngadto sa mga consumers.

Apan karon wala nay tanto reklamo ang mga consumers nga ang duha ka pribadong kompaniya ang nagdumala. Way angay kahadlukan ang mga consumers nga motaas nga water rate kon pribado na ang modala kay sama sa energy sector ug toll collection, gi-regulate man gihapon sa gobiyerno ang water rate pinaagi sa LWUA. Busa dili gihapon makapabuot ang mga pribadong kompaniya sa ilang gusto nga rate. Kon aduna may umento, minimal lang siguro. (bobbygnalzaro@gmail.com)