GIKASTIGO ni Presidente Rodrigo Duterte ang gitawag og Makabayan block nga gilangkuban sa partylist groups nga mga walhon sa Ubos Balay Balauranan gumikan sa kanunay nga pagsaway sa iyang administrasyon. Gi-akusahan man gani sa Presidente ang uban kanila nga konektado sa Communist Party of the Philippines/New People’s Army-National Democratic Front (CPP/NPA-NDF).

Unya daghan ra ba ni sila og representante sa Ubos Balay- Balauranan kay makakuha man usab og insaktong representasyon panahon sa eleksiyon. Aw, dili man usab kita makabasol niining maong gropo kay kini ang ilang adbokasiya sukad pa kaniadto. Sige man lang ni sila og supak-supak si bisan kinsang administrasyon. Mohunong lang siguro ni sila kon ma-ilisan na ang atong sestema sa pangagamhanan gikan sa democractic system ngadto na sa kumonismo. Pero angayan ba silang tangtangon na?

Ang kina-uyukan nga bahin ning isyo sa pagtangtang sa accreditation ug registration sa Makabayan block sa Kongreso mao ang pulong nga subversion. Gitumbok sila nga maoy mga legal fronts sa CPP-NPA-NDF. Ug kining subversion nagkahulugan og ‘undermining the power and authority of an established system of government.’

Gani gitinguha karon sa DILG nga habwaon nato og balik ang dugay nang gilubong nga anti-subversion law. Ang balaod maoy unang giwagtang sa dihang mi-asumir sa gahum si kanhi Presidente Cory Aquino human sa makasaysayanong 1986 Edsa People Power Revolution.

Nalimot kita sa katarungan nganong kini giwagtang ug wala na gi-ila nga krimen ang komunismo. Daghan ang nangapriso sa maong balaod sa panahon sa diktatoryang rehimen ni Marcos. Kasagarang kaso sa subversion gipabug-atan pinaagi sa illegal possession of firearms aron ang akusado ma-priso og dugay-dugay nga panahon.

Ato silang gihagit nga mosalmot sa atong pulitikanhong sistema inay mag-underground ubos sa sa landong sa demokratikanhong sistema. Karon gitinguha sa ubang sektor nga papason sila ug di na papasilungon sa landong sa demokrasya. Unsa ba toong matanga sa demokrasya unya ang atong mabatunan kon atong sampungan ang baba ug dili paminawon ang di susama pagbati ug paghuna-huna?