GIAKSIYONAN na sa City Engineers Office sa Davao City ang nahugmak nga porsiyon sa tulay sa Bunawan diin duha ka mga balay ang naguba.

Sa report gikan sa kapulisan sa Bunawan Police Station, duha ka mga balay ang naguba sa Purok 4-A, Barangay Bunawan Proper, ning dakbayan pasado alas 12 sa tungang gabii niadtong Abril 5, 2022.

Ang duha ka mga balay gipanag-iyahan nila Teofila Cristines, 62-anyos, ug Marijoice Rabutan, 31-anyos.

Sumala sa awtoridad, gilayong giaksiyonan ang maong hitabo ug gipahikling dayon ang mga silingan sa duha ka mga balay ug mismong mga tag-iya niini aron makalugar ang awtoridad sa pag-ayo sa porsiyon sa tulay.

Anaa sa mokabat kapin kun kulang P600 mil ang damyos sa hitabo.