BALHOG sa prisohan ang usa ka hamtong samtang gitunol ngadto sa Women and Children’s Protection Desk (WCPD) sa Tagum City Police Station ang duha ka menor de edad human madakpi atol sa drug bust alas 9:20 sa gabii niadtong Dominggo, Disyembre 1, sa lodging house sa Tagum City.

Mokabat P560 mil nga kantidad sa gituohang shabu ang nakumpiska sa suspek nga si Yasser Baunto, 29-anyos.

Sumala ni Talomo Police Station commander Police Lieutenant Colonel Ronald Lao nga nabalhin ang transaksiyon sa suspek nga mobaligya og shabu sa dakbayan sa Tagum.

Busa Dominggo sa gabii, miplastar ang operatiba sa Talomo Police Station, ubos sa Davao City Police Office (DCPO) aron sudlon ang suspek sa Room 15 sa Iguana Lodge sa Barangay Magugpo sa dakbayan.

Atol sa dinawatay og salapi bugti sa shabu, anaa sab sa sulod ang duha ka mga menor de edad nga posibleng runner ni Baunto.

Walo ka dagkong pakite sa gituohang shabu, cellphone ug marked money ang nakuha sa posisyon sa suspetsado.

Kasong pagsupak sa Republic Act 9165 kun Comprehensive Dangerous Drug Act of 2002 ang ipasaka nga kaso batok sa suspek didto sa korte. (Jeepy P. Compio)