TULO ka mga dayo gikan sa Sultan Kudarat nasikpaw sa kapulisan sa Baguio Police Station sa Davao City atol sa buy-bust operation pasado alas 6 sa gabii, Sabado, Oktubre 23, 2021, didto sa Toril District, Davao City.

Sumala ni Police Major Ricky Obenza, station commander sa Baguio police, ilang gipanid-an ang lihok sa tulo ka mga dinakpan hangtud nga nakigtransaksiyon kini ngadto sa nagtakuban nga pulis.

Mga suspek mao sila alyas Aki, 21-anyos; alyas Danny, 29-anyos, ug usa ka alyas Jainu, 27-anyos, pulos nagpuyo sa Lebak, Sultan Kudarat.

Dihang malampuson nga nasikop ang mga nahisgutan, gilayon silang giposasan ug nakuha sa ilang posisyon ang gituohang shabu nga motimbang sa 0.0056 gramos ug lain pang 1.0162 gramos nga dunay street value P20,000 ug ang Vivo smartphone.

Kasong pagsupak sa Republic Act 9165 kun Comprehensive Dangerous Drugs Act of 2002 ang atubangon sa mga dinakpan didto sa korte. (Jeepy P. Compio)