UNOM ka mga Badjao ang gipangbalhog sa selda sa Sta. Ana Police Station human maaktuhan sa pulis nga nagpustaanay sa ilang pagdula og Domino niadtong Huwebes, Abril 26 sa Purok 5, Isla Verde, Barangay 23-C Boulevard, Davao City.

Ang unom mao sila Johnny Arsani, 30-anyos; Baba Suwaeb, 35; Tumbukan Pagunsoan, 36; Hector Kaninggalan, 18; Jemli Colera, 18; ug Kusogan Kamluman, 46, pulos mangingisda.

Atol sa anti-gambling operation sa Sta. Ana PNP, naaktuhan ang mga nahisgutan ilawom sa balay nga nagdula og Domino nga dunay pusta.

Nakuha sa ilang posisyon ang pusta nga P80 nga maoy gihimong ebidensya.

Kasong kalapasan sa Presidential Decree No. 1602 kon Prescribing Stiffer Penalties on Illegal Gambling ang ipasaka nga kaso batok sa mga dinakpan didto sa korte.

Ang kapulisan nag-awhag sa katawhan nga kung dunay makit-an nga magdula og bisan unsa nga klase sa sugal, itug-an kini sa kapulisan aron masikop. (Richy F. Nalagon)