COTABATO CITY -- Giseguro ni Bangsamoro Autonomous Region in Muslim Mindanao (Barmm) Chief Minister Ahod Balawag Ebrahim ang “Serbisyong Totoo” alang sa 63 ka barangay nga gikan sa probinsiya sa North Cotabato nga ilawom na karon sa pagdumala sa kagamhanang Bangsamoro.

Si Ebrahim nagpasalamat kang North Cotabato acting Governor Emmylou Talino-Mendoza sa suporta alang sa Bangsamoro Organic Law (BOL) sa panghinabing pangkalinaw tali sa gobyerno ug Moro Islamic Liberation Front (MILF).

Samtang ang bag-ong gobyerno sa Barmm mapasalamaton usab sa suporta sa mga lokal nga opisyal sa probinsiya hinungdan nga midaug ang boto nga “Yes” alang sa paghilakip sa 63 ka barangay sa plebisito.

Dugo, singot, ug daghan ang nagsakripisyo sa ilang kinabuhi aron makab-ot ang bugtong kalinaw sa Mindanao sa dekada nga pakigbisog.

Gidugang ni Ebrahim nga ang “Serbisyong Totoo” nga programa kinahanglan nga mapadayon alang pag-uswag sa ilang komunidad ug magpuyo nga malinawon.

Mitulo ang luha sa gobernadora dungan sa hagit niini sa mga opisyal sa 63 barangay nga kanhi sakop sa probinsiya nga karon ubos na sa Barmm nga i-pursige ang “Serbisyong Totoo” nga programa alang sa kalinaw ug kauswagan.

Mitambong sa makasaysayanon nga turn-over ceremony nga gipahigayon sa Shariff Kabunsuan Cultural Complex sa Bangsamoro Palace sa Cotabato City ang mga mayor sa nagkadaiyang lungsod sa Kabacan nga gipangunahan ni Mayor Herlo Guzman Jr., Midsayap Mayor Romeo Arana, Pikit Mayor Sumulong Sultan, Aleosan Vice Mayor Eduardo Cabaya, Pigcawayan Mayor Jean Dino Roquero, Carmen Mayor Moises Arendain, mga Board Members sa North Cotabato, Vice Gov. Shirlyn Macasarte Villanueva ug mga opisyal sa Barmm, militar ug kapulisan.

Gipamahayag sa tigpamaba sa Barmm ug Ministro sa MILG nga si Atty. Naguib Sinarimbo nga ang pagtunol sa 63 ka barangay wala magpasabot og pagkasiak-siak apan dugang pagpalig-on sa relasyon ug pagdumala pinaagi sa husto nga koordinasyon sa Bangsamoro Government ug North Cotabato. Edgar E. Fuerzas