WALAY kabutangan sa kasubo sa usa ka ginikanan nga abo na lang sa patay'ng lawas sa iyang anak ang iyang sugaton.

Gabii sa Hulyo 10, 2021, Sabado, miabot sa Tactical Operations Wing (TOW)-Eastern Mindanao sa Davao Air Station Headquarters ang urn nga dunay sud nga abo sa patay'ng lawas ni First Lieutenant Karl Joseph Hintay.

Si Hintay mao ang co-pilot sa nahagsa nga C-130 sa Philippine Air Force (PAF) sa Barangay Bangkal, Patikul, Sulu niadtong Dominggo, Hulyo 4, 2021.

Ang inahan nga si Daisy Hintay maoy misugat sa urn sa iyang anak nga gisakay sa NC212i aircraft sa PAF.

Pagbuot sa mismong inahan nga i-cremate ang patay'ng lawas sa iyang anak didto sa Cebu City diin asa ang headquarters niini una kini gidala sa Davao City.

Nasayran nga tulo ka adlaw ihaya si Hintay sa Naval Forces Eastern Mindanao sa Camp Panacan dayon ilubong kini sa Forest Lake Memorial sa Maa, Davao City.

Saysay sa inahan ni 1LT Hintay nga misulod kini sa PAF aron magpiloto kinsa anaa pa kini sa 18-anyos sa pagsulod sa Philippine Military Academy ug mi-graduwar sa batch Salaknib Class 2017.