COTABATO CITY -- Personal nga atraso ang motibo nga gilantaw sa mga awtoridad sa pagpamusil-patay sa administrative officer sa local government unit (LGU) sa Maguindanao Province alas 7:00 sa buntag niadtong Sabado.

Giila ang biktima nga si Tho Malang, 35, minyo, Administrative Aid 1 sa Municipal Disaster Risk Reduction Management Council (MDRRMC) sa Ampatuan sa maong probinsiya.

Gibutyag ni Maguindanao Police Provincial Office Director Colonel Arnold Santiago nga sakay ang biktima sa iyang motorsiklo gikan sa balay ug paingon na unta sa buhatan sa MDRRMC apan pag-abot sa national highway dunay niatang nga duha ka wa mailhing lalaki ug namusil kaniya.

Nabalintong ang motor sa biktima ug nahulog pa sa lawom nga kanal daplin sa kalsada.

Patay gilayon si Malang nga naigo sa likod ug tangkugo.

Padayon pa ang imbestigasyon karon sa kapulisan sa Ampatuan Municipal Police Station.