COTABATO CITY -- Sikpaw ang tulo ka mga pulis nga namaligya og gidiling druga alas 10:00 sa buntag niadtong Miyerkules, Oktubre 30, sa probinsiya sa Maguindanao.

Mga pulis giila nga sila Patrolman Sandiali Mangundacan Manalao, Staff Sergeant Fahmi Bangon Como ug Master Sergeant Monjel Nassal Aradais pulos nadestino sa Marantao Municipal Police Station sa Marantao, Lanao del Sur.

Sumala sa Philippine Drug Enforcement Agency (PDEA) sa Bangsamoro Autonomous Region in Muslim Mindanao (Barmm) pinaagi ni Regional Director Juvenal Azurin nga nagpahigayon sila og entrapment operation sa Barangay Nituan, Parang, uban ang sakop sa Philippine National Police (PNP)-Barmm.

Sa diha nga gitunol na sa mga suspek ang shabu sa asset sa PDEA-Barmm, didto na sila gipangdakop.

Narekober gikan sa mga suspek ang 50 gramos nga shabu, mga armas, mga bala ug drug paraphernalia.

Nasayran nga si Aradais maoy deputy chief of police sa Marantao Municipal Police Station.

Mga suspek ang gibalhog na sa PDEA-Barmm ug gipasakaan na og tukmang kaso. (Edgar E. Fuerzas)