SAMDAN ang usa ka empleyado sa Local Government Unit (LGU) sa New Corella human gipusil sa wa pa mailhing mamumuno, Biyernes sa gabii, Enero 4, didto sa Purok 5, Barangay Poblacion, New Corella Davao del Norte.

Ang biktima giila nga si Nimfa Awatin Alcoran, 50-anyos, residente sa Tagum City.

Sa inisyal nga imbestigasyon sa New Corella Municipal Police Station, sakay ang biktima sa sakyanan sa usa ka konsehal sa dapit dihang, pag-abot sa lugar, gituktok sa usa ka lalaki ang bintana sa sakyanan.

Dihang giablihan sa biktima, kalit na lamang kining gipusil, igo sa iyang nawong ug daling gidala sa tambalanan sa Tagum.

Human sa insidente misibat ang suspek, nga naglakaw lamang padulong ngadto sa wala matino nga direksyon.

Padayon pa karon ang imbestigasyon sa kapulisan aron masayran ang motibo ug maila ang mamumuno.