MAKILALA, North Cotabato -- Gikalisang sa mga sibilyan ang pagpamomba sa militar sa kampo sa mga armadong grupo alas 4:35 sa kadlawon, Dominggo, Mayo 19 sa probinsiya sa Cotabato.

Sa taho gikan sa Cotabato Police Provincial Office nga kaduha ka higayon nga namomba ang duha ka MG-520 Attack Helicopters sa Philippine Air Force sa kampo sa New People’s Army (NPA) sa Barangay Kisante, Makilala.

Nakugang ang mga sibilyan sa mga dagko nga buto hinungdan nga nanagan sila paingon sa luwas nga dapit.

Misamot ang kahadlok sa mga molupyo sa diha nga gisundan pa kini sa buto-buto sa tag-as nga matang sa armas.

Miatras ang mga rebelde paingon sa hilit nga dapit sa tiilan nga parte sa Mount Apo.

Gikanayon sa mga sibilyan nga namakwit nga ilang nakit-an ang duha ka NPA nga napatay samtang tulo ang naangol nga gipas-an sa mga NPA sa ilang pag-atras.

Sa kasamtangan nagpadayon ang paglutos sa puwersa sa 39th Infantry Battalion Philippine Army batok sa mga NPA sa Makilala.